【名家給力場】投資港樓冇著數？

【Now財經台】噚晚美國聯儲局加息0.25厘後，金融管理局今日即跟加，幅度亦一樣，滙豐銀行亦加同供樓有關嘅最優惠利率(P)0.125厘至5.875厘。

臻享顧問董事總經理王良享認為，依家香港銀行同業拆息(HIBOR)逾5厘係過高，並指本港經濟環境穩定，唔似以往揸港元有風險溢價，所以港息有條件稍微低過美息，並相信HIBOR快見頂。

Tommy續指，美國經濟亦轉趨穩定，預期聯儲局最快9個月後先開始減息，但依家有別於2008年或2020年嘅量化寬鬆(QE)環境，美國短期內亦冇需要做QE，估計港息唔會因為美國減息而大幅回落。參考聯儲局預測長期利率為2.5厘，佢預期，港息最盡跌到2.5厘至3厘。

基於上述預測，王良享認為，本港樓市短期前景仍然唔係太樂觀，當港息未來5年維持3厘以上，但通脹唔夠3%，投資房產就冇咩著數。