【名家給力場】Apple或失「股王」寶座(下)

【Now財經台】上半年由ChatGPT掀起嘅人工智能(AI)熱潮帶動美股向上，不過，「股市漁夫」創辦人莊志雄分析指，「股王」蘋果就快見頂，仲話「股王」地位隨時不保！

Lewis認為，上半年Apple勁升或因為臨近季結，基金為粉飾櫥窗(window dressing)就夾最重磅嘅蘋果上去嚟整靚盤數，然而，集團現時每股盈利(EPS)預測已經向下，而行政總裁Tim Cook繼上年8月後，今年4月再大手沽貨，兩個跡象均反映現時蘋果股價虛高，高層趁高沽貨套現。

佢又預期，未來有劃時代AI產品嘅科技企業，將會造就下一個牛市，而Apple最後一個明顯帶動股價嘅產品已經係2016年推出嘅AirPods，欠缺令市場有驚喜嘅創新產品。

Lewis續指，Tesla有望成為下一隻「股王」，佢話公司係8隻標指重磅股中，最有能力推出真正創新嘅AI產品，例如預計未來幾年量產嘅人形機械人Optimus。