【專家分析】「周董概念股」抽唔抽得過？

【Now財經台】今日開始招股嘅巨星傳奇(06683)，主要賣點係台灣藝人周杰倫嘅明星概念，屬於新零售(包括直播帶貨業務)及IP創造公司，計劃發行近1.27億股，招股價介乎5.5至6.3元，集資最多8億元，以每手500股計，入場費約3182元，目標於6月13日掛牌，扣除原始股東減持部分後，實際上巨星傳奇集資最多唔夠5億元。港股近排氣氛差，雖然巨星傳奇入場費唔貴，但就算係粉絲都似乎冇非抽不可嘅理由？

博威環球資產管理金融首席分析師聶振邦指，巨星傳奇孖展認購暫時仍未足額，大市投資氣氛差，睇返招股情況都反映承接力唔夠，由今日起計，仲有約兩個星期先上市，到時大市情況係點冇人知，所以變數都幾大，因此，即使有明星效應，建議投資者要審慎看待睇呢新股。