【FINTERVIEW】人仔短期有機試7.2至7.3水平

【Now財經台】雖然人民銀行維持貸款市場報價利率(LPR)及中期借貸便利(MLF)不變，但人仔繼續跌，其中，離岸人仔今朝跌至逾半年低位，喺7.08水平徘徊，點解人仔近排咁弱勢？

渣打香港財富管理投資策略主管梁振輝指，主要係近期內地經濟數據比較弱，加上美元整體較為強勢，市場近期對美國下半年大手減息嘅預期降溫，甚至再度加息，帶動咗整體美元氣氛，導致人仔「跟跌」。

Will又話，短期要留意內地經濟數據有冇改善，另一方面，市場依家都擔心人仔會唔會去返舊年第4季低位，事實上，跌穿「7算」後的確持續向下，如果美國上半年真係加完息，而下半年有機會減息，到時會對人仔有較大幫助，但短期仍難免波動，有機會試7.2至7.3水平，但預期美息下半年整體向下，屆時會帶動美元兌人仔回返去「7算」樓下。