【專家分析】小米首季毛利率可以升到19.2%？

【Now財經台】綜合18家券商預測，小米集團(01810) 首季收入預料介乎569億至606億人民幣，按年跌17%至22%。其中，中信里昂預計，小米首季整體收入跌22%至不足600億元，有機會係近3年嚟收入表現最差嘅季度。美銀證券就估計小米首季毛利率將升至19.2%，呢個數字係咪太過樂觀？

元宇證券基金投資總監林嘉麒指，市場對毛利率預測唔會過於樂觀，原因係非硬件相關業務容易將毛利率拉返平均，加上小米中高端手機業務已經開展咗一段時間，去年推出的型號都以高端為主，相信都有助改善毛利率。

據中金估計，小米首季手機毛利率升至11%，按季按年都有改善，主要係受惠上游零部件減價，同埋做多咗中高端手機銷售。市場預計小米季內推出中高端手機，可以提升集團内地手機平均售價，但整體售價2月仍然低過上年第四季。

小米手機業務面對銷量跌而價格難提升，KK話手機業務短線嚟睇好難有改善，主要係同大環境經濟有關，全球智能手機銷量按年下跌，內地亦有類似情況，如果小米要逆市上游會有一定難度，KK建議投資者反而可以留意，小米第一季市佔率方面有冇機會上升。