【名家給力場】港股收復唔到牛熊線要下試...

【Now財經台】港股繼續上演牛熊線攻防戰，恒生指數暫時已連跌第4日，今日午後繼續失守250天線，其實外圍股市都弱，包括A股及美股，上證綜合指數及道指都係4連跌，點解環球股市近期表現咁差？

冠域商業及經濟研究中心主任關焯照表示，A股表現差過其他股市，估計同經濟數據差、通縮陰霾、內需較弱有關，加上復常速度唔理想有關。至於港股更加係持續弱勢，除受ATM拖累，加上「中特估」概念股回氣，就拉咗個市落嚟，相信恒指喺19500點水平暫時會有支持，但大市已跌穿250天線，即19700點水平，如果上唔返250天線，可能要再下試19500點。

經濟數據唔好，衰退風險愈來愈大，美國似乎會暫停加息，而減息機會又愈來愈高，會唔會有利市況？關博士指，通常停止加息嗰個階段會有少少沖喜作用，但當經濟逐步放緩，甚至步入衰退，股市通常都會跌，而反應最大會喺傳統股或金融股，科技股都會跟跌，但應該冇傳統股跌咁多。