【FINTERVIEW】下半年揀邊個中字頭板塊炒？

【Now財經台】雖然恒指近日未有出現大突破，但中字頭板塊熱炒，因為有估值平、高息、穩陣呢啲賣點，而「中國特色估值」炒起咗電訊股、石油股，而內銀、內險股上星期表現都好搶鏡，後市有咩板塊值得睇高一線？

富邦銀行(香港)投資策略及研究部主管潘國光指，有政策扶持嘅板塊可以睇高一線，過去一兩年，監管及扶持措施逐漸見效，加上疫後經濟前景轉趨明朗，唔同板塊都有投資機會，佢估計，下半年新能源汽車股好大機會出現突破，開始進入國際市場，德國過往只輸出汽車畀中國，但近年形勢唔同咗，德國多咗輸入中國汽車，新能源汽車生產量方面，比亞迪股份(01211)更爬咗Tesla頭，呢個板塊除咗有本土政策扶持，喺國際市場亦有一定增長爆發力，投資者不妨留意下。