【FINTERVIEW】美下月加息可能性僅50%

【Now財經台】美國噚晚出爐嘅服務業及私人企業職位等數據都差過預期，令經濟陷入衰退嘅憂慮升溫，亦令聯儲局5月暫停加息嘅預期再升溫，下月暫停加息嘅機會升至57%，加息0.25厘嘅機會降至43%。今個星期初因為石油輸出國組織及盟友(OPEC+)突然宣布減產，市場擔心會刺激通脹升溫，令聯儲局5月加息0.25厘嘅機會增加，但依家因為經濟數據差又跌返，5月議息結果似乎仍有好多變數。

東亞銀行財富管理處投資策略師陳偉聰指，美國有銀行倒閉後，開始見到市場有啲炒作，佢估計，聯儲局嚟緊都會放慢加息步伐，甚至會喺5月暫停加息，不過，之後OPEC+減產、油價升，以及聯儲局官員繼續放鷹等，都會令利率走向、利率期貨喺未來幾個星期，就聯儲局下月係咪加息嘅預測搖擺不定，佢認為，美國5月係咪加息暫時都係「五十五十」。