【專家分析】阿里美股大升唔係炒分拆重組？

【Now財經台】阿里巴巴(09988)創辦人馬雲前日返到杭州後，噚日阿里隨即有大動作，集團計劃將業務重組成6大業務，又指當每項業務成熟時，會獨立尋求融資或上市，市場對呢個重組計劃似乎好受落，阿里美股ADS收市大升14%，港股今朝接力炒上，一度勁升16%，今次呢個大動作，係咪可以釋放到整個集團嘅價值？

高富金融集團投資總監梁偉民指，劃分成唔同業務後，可望提升管理效率，而分拆亦可反映隱藏價值，更重要係，阿里股價大升，其中一個主因可能係阿里將業務打散，中國政府對管理層影響力嘅憂慮會減少，對集團嘅監管嚴謹度亦會放寬，而呢個因素會喺短期左右阿里股價嘅關鍵。

Wyman又話，阿里股價過去1年有一個好大隱憂，就係內地監管會影響集團發展，如果管理層影響力分散咗，唔再集中喺幾個人身上，令阿里不同業務未來有更大發展空間及活力，呢個正正係阿里美股大升嘅原因，而非分拆消息，並相信股價短期仍有上升動力。