【專家分析】美銀行或爆資金遷徙潮

【Now財經台】華府及相關部門迅速「撲火」下，由矽谷銀行(SVB)、Signature Bank倒閉引發嘅銀行業動盪憂慮降溫，而為咗遏制潛在嘅金融危機，據報聯儲局考慮向中型銀行實施更嚴格規定，同樣爆出流動性危機嘅第一共和銀行(First Republic Bank)同時遭兩大評級機構列入負面觀察名單，穆迪亦將美國銀行業評級展望降至負面，今次因有銀行倒閉引發嘅信心危機，最壞情況過咗未？

潤淼資產管理董事盧志威指，SVB「死因」係輸咗錢，加上融資做得唔好，引爆信心危機繼而倒閉，但情況同雷曼唔同，其實短期流動性危機已經解決，由於有唔同方法可以處理到，例如由政府接管等，最後應該可以成功「拆彈」。

William又話，要留意一間銀行冧咗之後可能引發嘅遷徙潮，錢會由地區銀行搬去大銀行，相信唔少大企業都會咁做，長遠嚟講，會令小型銀行被邊緣化，因此，即使市場氣氛回穩後，地區銀行嘅股價表現都唔會好。