【名家給力場】聯儲局亂嗡令市場混亂(下)

【Now財經台】美國聯儲局主席鮑威爾噚晚喺參議院作證時「放鷹」，指已準備好喺必要時擴大加息幅度，利率見頂水平可能高過預期，利率期貨即時有反應，今個月加息0.5厘嘅機會急升至70%，過去半年，市場對美國嘅加息預期大上大落，依家係咪處於一個比較混亂嘅狀況？

「股市漁夫」創辦人莊志雄指，混亂係聯儲局一手造成，依家再推遲減息，未來可能因為加息加過龍，導致美國經濟嚴重衰退，睇返終極利率，由於局方經常「嗡三嗡四」，令市場參與者之前以為利率已見頂，但依家又走出嚟講嘢，原因係過去1個月公布嘅數據，反映通脹仍高居不下，佢又話，佢之前已經估計美國通脹已見頂，但要急速回落唔係咁易。

Lewis又指，若聯儲局之前冇講放慢加息步伐，如果投資者只係估估下就唔會亂炒，1月講完嘢之後，令投資者有個錯覺聯儲局好快加完息，甚至今年開始減息，由於局方冇預測能力，通脹走向亦唔會知，一見到數據唔對路，又要掉轉講，增加咗美國利率預期嘅波動性，絕對唔係好事。