【期匯決算】美元仍有上升空間

【Now財經台】美國CPI及零售銷售數據已先後出爐，通脹超預期，零售銷售亦好過預期，睇返美元走勢，係咪已經見咗短期底位？

亨達集團助理總經理羅明立指，美國近期出咗好多經濟數據，雖然通脹仍然係回落緊，但回落速度及幅度冇市場預期咁樂觀，而最新嘅就業數據反映勞工市場仍然熾熱，為聯儲局繼續加息提供咗理據，但加息幅度未至於去到0.5厘，關鍵係在於仲要加幾多次，市場估計，最少會加多兩次，但仍須視乎未來嘅經濟數據，先知道會唔會再加息。

Patrick又話，今年嘅情況好反覆，對美元未必會有好大刺激作用，但美元應該仲可以升多少少，但未必會咁快展開單邊上升行情。