【名家給力場】鮑威爾鷹定鴿唔重要(上)

【Now財經台】隔晚聯儲局主席鮑威爾發表講話，雖然同日前亞特蘭大聯儲銀行行長嘅口徑一致，話美國經濟持續強勁，利率峰值可能高過預期，但市場似乎未受佢嘅言論影響，仲解讀為鮑威爾言論唔夠鷹，美股照升，鮑威爾講話係咪真係冇市場預期咁鷹？

「股市漁夫」創辦人莊志雄指，呢個係市場解讀，但最重要係睇返資產價格表現，因為可以反映市場點樣解讀，反而市場人士點講係另一回事。佢認為，過去一星期資產價格表現幾奇怪，可能市場聚焦喺美股標普500指數身上，但其實鮑威爾發言後，或重磅科技股出咗業績後，出現一個奇怪現象，就係美元升，美債跌價，美債息升，而對利率十分敏感嘅黃金，價格亦下跌，如果睇返資產價格，除美股外，偏向係「水緊咗」。

Lewis又話，嗰個星期鮑威爾講咗兩次嘢之後，睇資產價格除美股外都係偏緊，所以佢講嘢鷹或鴿並唔重要，最重要係睇返資產價格表現。