【名家給力場】又供股撲水！愛高孭重債點收科？

【Now財經台】愛高集團(00328)建議將股份50合1，待股本重組後，再按1供4比例供股集資，供股價每股1.425元，集資逾8900萬元，主要用嚟還債。集團股價近1年維持仙股狀態，合股及供股消息傳出後，股價今日一度急瀉逾23%，呢個集資計劃目的係咩？散戶應該點解讀？

《香港股票財技密碼》作者梁杰文指，愛高近年陷入虧損困局，急需要還債，供股價較經調整收市價1.9元，折讓25%，雖然幅度唔算好大，但股價喺高位不斷碌落嚟，依家市值得返2000幾萬元，原本持貨嘅股東輸淨無幾，散戶只能迫於無奈接受。不過，今次供股集資唔涉及包銷商，如果冇足夠小股東供股，計劃都未必成功。

Mike又提及，愛高舊年配股籌咗千幾萬，都拎晒去還債，今次供股集資金額，相對十幾億負債只係杯水車薪，加上公司從事電子產品銷售，面對日韓企業嘅激烈競爭，又不斷出現人事變動，即使今次成功供股集資，都未必支持到長遠營運。