【專家分析】美大型消費股唔好掂

【Now財經台】美國上季GDP按季增長放緩至2.9%，勝預期，有分析認為，美國經濟軟著陸機會增加，美股3大指數噚晚以接近全日高位收市，其中納指一度上試200天線。

博威環球資產管理金融首席分析師聶振邦預期，美股會繼續向好，道指突破34500點水平後，會遇到較大阻力，意味較噚晚收市33949點，仲有幾百點潛在上升空間，而標指、納指之前落後道指唔少，佢認為後市有機會跑贏道指，而新經濟股亦有睇頭。

不過，高盛指，美國GDP嘅細數疲弱，消費、企業投資增長大幅放緩，進出口數據亦向下，純粹係庫存增加推高咗GDP。傳統行業方面，尤其係消費相關企業嘅業績唔太理想，IBM及玩具公司孩子寶等又話裁員，美國市道似乎唔太好景。聶Sir估計，大型消費股會陸續有裁員消息，現時不宜沾手。