【專家分析】A股及港股有復常憧憬撐住

【Now財經台】內地加快邁向全面復常，帶挈港股今朝一度衝上19700點樓上，依家恒指及科指距離250天牛熊線，只差約6%及4%，但港股呢輪升浪好急，係咪都要小心？參考野村嘅報告，依家內地感染新冠病毒嘅累計比率，僅佔總人口約0.13%，長遠嚟講，面對80%至90%人口會中招，未來幾個月嘅復常道路，係咪會對醫療、供應鏈等帶嚟震盪？

華盛証券分析師聶振邦指，港股近期造好都有成交配合，持續喺1600億元樓上，佢認為，某程度上同人民銀行周一開始降準有關，因為釋放咗資金出嚟。疫情方面，聶Sir估計，未來重症個案相信仍會較少，由於內地亦有機會實行「在家工作」，相信對於經濟活動只有輕微影響，因此，對內地復常嘅憧憬仍然持續，亦可以支持內地及香港股市繼續有好嘅表現。