【名家給力場】美股今年有冇聖誕老人升浪？(上)

【Now財經台】美國聽日開始感恩節假期，隨即踏入傳統消費旺季，究竟美股今年會唔會出現聖誕老人升浪(Santa Claus rally)，即係股市喺聖誕節假期後重整向上？

近日美股行情唔錯，反映市場恐慌情緒嘅VIX指數亦跌回相對低位，投資情緒高漲。不過，「股市漁夫」創辦人莊志雄認為，投資者又炒錯預期，因為美國10年期國債嘅引伸波幅喺過去1周又靜靜哋回升，意味投資者對後市唔樂觀，反而今年債券投資者睇市比較準，所以股市其實唔係咁好景。

Lewis又話，美國家庭資產配置中，股票比重逼近2020年高位至逾40%，調查亦顯示投資者未來數周欠缺增持股票嘅意欲，佢估計，唔少美股投資者可能已成手蟹貨，預期未來1個月難有大成交配合推升美股。此外，美股中長線基本面亦麻麻，指數成分股不斷下調盈利預測，難以吸引長線投資者入市撐場。

佢續指，鷹派代表、聯儲局主席鮑威爾將於11月30日發表講話，到時好可能會再「放鷹」衝散升市預期。