【名家給力場】基石買主席資產物有所值？

【Now財經台】基石控股(01592)上周五宣布，向控股股東兼主席雷雨潤收購內地雲石及花崗石銷售分銷業務，即係廈門亞太全部股權，總代價1億元，代價會以發行新股支付，涉及5.97億股，基石股價今朝一度急挫逾14%，點睇今次呢單收購？

《香港股票財技密碼》作者梁杰文話，呢單交易嘅估值唔平，向好嘅方面諗，公司唔使出錢，全部靠印「公仔紙」收購，雖然大股東股權集中咗，但其他股東權益就被攤薄。值得留意係，基石最初上市只係從事港澳業務，依家透過發新股收購埋大股東內地嘅雲石供應業務，的確係有少少優勢，因為大家都係同行，而唔係完全唔熟悉嘅行業。

Mike又話，呢單收購嘅關鍵係，集團純利保唔保持到，甚至錄得增長，如果純利只因收購谷高咗，之後又跌返落去，呢單收購又未必值得。