【FINTERVIEW】美股債仲未見底

【Now財經台】美國加息後，隔晚美債即時有反應，2年期債息升穿4.7厘，再創15年新高。同時，2年期同10年期債息現倒掛，係經濟陷入衰退嘅指標之一，情況係1980年初以來最嚴重。

臻享顧問董事總經理王良享認為，聯儲局(FED)樂見債市如此反應，因為上次加息後美國金融條件其實冇收緊過，美股喺10月仲有得升，就證明市場仲有閒錢投資，佢估計FED喺12月會再加息0.5厘。

王良享又預期，FED縮表速度仍算慢，相信美國市場仲有足夠流動性，美國明年只會陷入輕微嘅經濟衰退，而由於美國樓市依家先開始下跌，認為美股同美債尚未見底。