【專家分析】英退休基金瀕爆煲恐變「英版雷曼」

【Now財經台】近日央行出手干預、救市成為金融市場嘅主題，其中以英倫銀行周三起入市買長債至10月中，帶動英鎊喺周一見歷史新低後連彈3日，今朝亞洲交易時段早段更一度重上1.12水平。

不過，英倫銀行一邊加息，一邊緊急買債救市嘅操作，其實非常矛盾。綜合外電報道，原來央行係為咗挽救投資咗1萬億英鎊英國國債嘅英國退休基金，呢隻基金利用負債驅動投資(LDI)嘅對沖策略，買入國債後拎出市場做抵押品，然後再集資。自上周五新政府宣布迷你預算後，被用作抵押品嘅國債價格急跌，於是基金就被追孖展，喺呢個情況下，英鎊仲會唔會繼續彈？

華盛証券分析師聶振邦認為，英倫銀行嘅舉動係避免投資者對退休基金失去信心，繼而引爆贖回潮，繼而令退休制度土崩瓦解，不過，新政府要到11月先公布財政預算及發債規模，市場好難估計央行究竟會接幾多貨，以抵銷發債影響，佢估計，短期內債價仍有下行風險，意味債息仍有機會上升，未必化解到退休基金面臨嘅「雷曼時刻」。

聶Sir又預期，英鎊10月將會靠穩，但當美國聯儲局11月再加息，加上英國新政府推出大規模減稅方案，相信會令英國通脹升溫，到時英鎊會有貶值壓力。