【專家分析】美港股市下季續尋底

【Now財經台】隨著美國聯儲局今個月再加息0.75厘，拖累美股3大指數全部步入熊市，6月以來嘅反彈浪升幅已全數蒸發，自高位回調21%至33%。美股仲有3個交易日就到雙重結算，展望第4季，係咪要進一步尋底？

艾德證券期貨投資策略總監文錦輝指，暫時睇唔到美股有止跌跡象，而美國經濟下季好大機會陷入衰退，好多投資銀行都出報告，建議投資者減磅轉揸現金。佢又指，美股正式步入熊市，好多散戶會趁技術反彈沽貨套現，機構投資者同對沖基金又趁機造淡，加上投資者寧願將資金泊去美元，喺欠缺新資金下，估計美股下季會繼續尋底。

港股方面，噚日市傳中央要求金融機構喺「二十大」前要維穩股市，A股噚日收市全線造好，但港股只係尾市掉頭，收市僅微升5點。Felix認為，港股跌穿18000點後已不宜沾手，又話距離下個支持位15000點仲有好大下跌空間，建議等「二十大」完結，恒指上返18200點先考慮撈底。