【名家給力場】標指最少要再跌30%？(上)

【Now財經台】美國8月消費物價指數(CPI)反映通脹仍未受控，市場預期聯儲局加息步伐會更進取，拖累美股噚晚急瀉。

「股市漁夫」創辦人莊志雄指，觀察到仲有唔少散戶追入美股指數嘅ETF想撈底，但佢認為，好多人仲未意識到今次美股跌勢唔係一般調整咁簡單，因為美國嘅金融系統正承受好大壓力，例如惡性通脹、經濟衰退，亦未知有冇金融機構會出事，因此，美股好有可能落返6月低位。

Lewis又話，雖然據圖表分析，VIX指數周期波動喺9月19日(下周一)見頂，但佢強調，依家嘅市場風險已不能單靠技術分析預測，可能今次指數會繼續衝上去，反映落美股就可能有大事發生。佢又提及，美股高息企業債ETF亦跌至近6月低位，根據圖表分析，標普500指數通常都會跟隨高息企業債回落。

再睇埋美國銀行嘅基金經理調查，Lewis話基金經理持股比重已大幅下降，2008年金融危機時，基金經理亦係減倉減到低於正常水平，反映指數都仲未見底，預期標指可能會再跌30%至40%。