【名家給力場】歐洲股市大挫滙豐都要遭殃？(上)

【Now財經台】歐元跌至一算以下，歐元資產表現相對亦差，整體金融市場有乜啟示?

「股市漁夫」創辦人莊志雄指，歐洲經濟數據出爐觸發歐元急跌，而一算呢個大位完全冇支持，Lewis相信係一個警號。綜觀過去一星期，歐洲股市表現差，影響環球股市，市場會聚焦喺Jackson Hole會議內容上，不過無論放「鷹」定放「鴿」，都改變唔到歐洲局面，因為佢地面對緊好多問題。德國喺以往跌市時應該跌得最少，而且跌幅同標普500指數差唔多，但德國ETF喺過去一個禮拜跌幅為標普500嘅兩倍。另外，跌得第二多嘅歐洲MSCI金融股ETF跌6.4%，整體歐洲Stoxx 50指數同歐元累跌6.28%。當歐元跌時，美匯指數會升，對股市同金融狀態有收緊作用，最受影響就係金融機構。過去一個禮拜德意志銀行股價跌約10%，瑞信股價亦下試幾十年來低位，其他銀行都要跌，在歐美銀行中最穩陣嘅摩根大通亦受拖累，跌6.5%。滙豐控股(00005)過去一個禮拜累跌5%，Lewis認為滙控遲早被歐洲股市拖累。