【FINTERVIEW】勿寄望「準藍籌新貴」推升港股

【Now財經台】恒指季檢結果上周五出爐，除咗百度集團(09888)，二度「染藍」嘅中國神華(01088)，爆大冷嘅周大福(01929)同翰森製藥(03692)會喺兩周後正式成為「藍籌新貴」，4隻股份今日都有得升，不過，招銀國際策略師蘇沛豐就指，4隻「準新貴」比重唔夠1%，未必推得郁港股。

蘇沛豐指，神華係一隻周期性股份，最近因為煤業興旺令市值水漲船高，但要小心染藍「魔咒」，即過往有唔少股份納入恒指成分股後，喺行業嘅表現好快到頂。至於黑馬翰森，Daniel指股份交投唔活躍，但喺行業具代表性，符合恒指改革後嘅入選條件。

此外，大藍籌騰訊控股(00700)、阿里巴巴(09988)佔指數比重，再上調至8%及7.34%，Daniel認為，依家市場更關注大股東減持，佢預期今次成分股變動唔會刺激到後市。