【名家給力場】美股係咪重新起動？(上)

【Now財經台】過去一個星期，美股投資者似乎回復樂觀心態，一方面認為，美國通脹有機會已經見頂，其次預期聯儲局9月加息幅度或有機會開始收窄，大行高盛亦樂觀預期，美國經濟有機會避過衰退，實現軟著陸，美股是否到了重新起動的時候呢？過去一周，與其他資產比較是否印證這股心態？

「股市漁夫」創辦人莊志雄話，依家市場心態開始冇咁悲觀，甚至有講法話睇返好，最主要嘅理據係當標普500指數跌後反彈到跌幅嘅一半，之後就唔會再創新低，但呢種講法就睇得太短，睇返過去100年歷史，跌後反彈到跌幅嘅一半，未擺脫熊市都試過唔少次，之前5月同6月時都話要小心有大反彈，依家的確係發生緊，而且標普500指數已經去到200天線，估計破200天線嘅幾個百分比都唔出奇，以往有10%時間會去到反彈跌幅75%，所以標普500指數去到4400樓上都唔出奇。

Lewis又話，過去一個禮拜，美股一支獨秀，跑贏各類資產價格，美債、美金都跑輸比美股，有一個特別現象，網紅股(Meme Stock)代表係襯熱鬧，係一啲網站、留言區或者討論區見到某個知名投資者，例如Michael Burry等人買咗啲咩，咁啲人就會跟住去追，例如上年GME、今年AMC都係咁樣炒，所以Meme ETF跑贏標普500指數升幅嘅一倍，代表散戶開始Fear of Missing Out(FOMO)，即「怕執輸」心態，驚牛市嚟咗，怕執輸要追入去，但大家唔好忘記，例如2009年牛市出現，標普500指數係666點，就算升到1300點先追，其實之後都有倍數升幅，所以唔需要Fear of Missing Out，如果真係牛市返嚟，都唔係高追，而係等佢回返落嚟先買，等牛市確認咗先買係安全啲。