【名家給力場】通脹升溫利防守型股份(下)

【Now財經台】內地今朝出咗通脹數據，今晚就輪到美國CPI出爐，到底美國通脹會點走？有分析預期按年會回落至9%以下，美股之後又點反應？

「股市漁夫」創辦人莊志雄指，睇返上次聯儲局議息聲明，以及主席鮑威爾嘅發言，比巿場嘅感覺都係偏鴿，所以美股之後持續反彈。不過，過去幾日出現咗變化，局方有官員放鷹，令加息預期由加0.5厘，變成有70%投資者認為會加0.75厘，所以近幾個交易日，一啲同未來盈利掛鈎嘅股份，尤其係優質股，都冇力升上去，呢個現象主要同未來息率預期有關，如果息率再升溫，FANG指數、納指100指數等都會跑輸標普500指數。

Lewis又話，睇埋唔同行業表現，一啲同消費相關業務都跑輸標指，反觀受惠於息率嘅行業、收息類或防守型嘅股份表現較好，例如金礦股嘅股息率已高過公用股指數，以前金礦股唔係收息工具，但喺依家嘅情況下，加上通脹升溫，都有利貴金屬價格，因此，當通脹預期升溫時，主打防守嘅股份就會造好，消費或半導體股表現就較差。