【名家給力場】美股熊巿反彈未完？(上)

【Now財經台】美股噚晚勁彈，睇返過去一星期，外圍、新興市場股市表現都唔錯，但A股、港股因內房「爛尾樓」風暴而跑輸，點解讀上周外圍呢個反彈？係咪反映已經見咗短期底？

「股市漁夫」創辦人莊志雄指，今次嘅反彈已經行咗幾個星期，雖然反彈比較反覆，但如果計返收巿低位，標指噚晚彈到6%至7%，如果係熊巿反彈，佢認為仲有得彈，但係反彈嘅情況都有分先後次序，從環球股巿嚟講，第1季A股、港股跌得最殘，所以會率先反彈，美股跌到6月就開始反彈，同樣都係由跌到最殘嘅增長股、科技股及虛擬貨幣彈起先。不過，去到反彈中段，其他大巿值美股都反彈，所以過去一星期就唔同之前，而納指就跑嬴咗ARKK。

佢又話，去到今個星期，由於大家都以為美元出現突破，但依家已跌穿晒突破日嘅升幅，變咗歐元有得升，幫到歐洲股巿，而歐元升幅更高達6%，所以歐美股巿係全面反彈。

Lewis認為，由於美元早前強勢，令投資者對新興巿場有憂慮，加上內房危機影響緊A股、港股，但A股、港股之前都試過跌得幾殘，佢提醒投資者唔好喺上落巿高追，喺低位亦唔使太驚，反而可以考慮買返啲貨。