【名家給力場】美股有一個危機發酵緊？(上)

【Now財經台】美元持續強勢，美匯指數近日衝上108水平，雖然市場驚美國經濟衰退，但另一方面，美元資產就受惠於匯價而有支持，喺唔同因素夾雜下，美元強勢對美股有咩影響？

「股市漁夫」創辦人莊志雄指，如果美匯指數要挑戰119、120水平，需要有重磅消息配合，例如有金融機構爆煲及金融危機等，喺美匯指數強勢下，就算之前表現最好嘅滬深300 ETF，但第3季一開局都要跌，但有趣嘅地方係，傳統上美股喺7月頭兩個星期，表現係會好啲，喺美匯強勢下，美股都冇跌，更加有趣係，第1季做得最差嘅，例如ARKK或零售股ETF，喺美股彈返少少之下，反而做得唔錯，至於下半年業績指引幾差嘅Micron，股價不跌反升，美股依家喺度做緊一個反彈，而呢個反彈似乎未完，佢估計可能會再夾多一下勁啲先完結。

至於點解「契媽股」彈得咁靚仔，莊志雄指，其實呢啲股份已自高位回落咗起碼60%，應該已反映咗經濟衰退呢個壞消息，但就未反映違約風險，一旦有大量公司倒閉，即使以前較吃香嘅IT行業，都會爆裁員潮，情況類似2001年、2002年科網股爆破後嘅情況，最終可能有主要公司倒閉或債券違約，呢類事件仲發酵緊，未有好多消息走出嚟，一旦傳出呢啲消息，跌市就會再出現。