【名家給力場】FANG指數有向好訊號?(上)

【Now財經台】自從6月至今，中美股市的確見到反彈，只係歐洲股市差啲。月尾又到聯儲局議息會議，中美股市仲有幾大反彈空間?

「股市漁夫」創辦人莊志雄指，反彈過程可能只到中間，睇返以往7月嘅記錄，通常上半月都相對造好啲，不過依家處於熊市，統計數字都要打個折扣，但暫時嚟計，佢認為個反彈未完。睇返6月中到依家，其實同年初到依家有啲變化，FANG股票由年初到最差嘅時候，即5月低位，FANG指數共跌近40%，但標普500只跌約20%。不過，依家FANG指數反彈，跑贏標普500指數，呢個新變化主要係因為美國債息跌穿3厘。睇返亞特蘭大聯儲銀行數據，第二季GDP好大機會係負數，而美國衰退嘅因素已經被市場消化，通常都會利好Long Duration Asset，即較優質嘅股票。

Lewis又話，優質股票嘅表現同債息好大關係，之前驚通脹失控，債息急升導致優質股跌殘，債息回落時，呢類股票反彈力度就好啲。FANG指數喺年初到最差嘅時候跌咗近40%，當時跑輸大市得好極端，因此，如果個市繼續跌，優質股嘅跌幅就會減慢，如果有淡友重倉喺FANG股票，就要小心會挾得好犀利。