【名家給力場】美經濟陷入深度衰退？(下)

【Now財經台】美國聯儲局將於本港時間周四凌晨公布全球關注嘅議息結果，喺通脹衝上40年高位呢個背景下，到底聯儲局最終會加息0.5厘、0.75厘，還是更進取嘅1厘？

「股市漁夫」創辦人莊志雄指，聯儲局好鍾意經《華爾街日報》一位記者放風，點解利率期貨市場突然間由預期加息0.5厘，變成加息0.75厘，正正就係由呢個記者傳出嚟，市場喺星期一已即時反映，亦即時反映7月都會加0.75厘，依家不論債市或信貸市場都講緊未來兩個月會合共加息1.5厘，而聯儲局通常都會順應市場，即利率期貨Price In加幾多，佢哋就加幾多。

Lewis又話，如果以慣常做法，今晚應該加0.75厘，但問題係，由於通脹數據超預期，遏通脹嘅壓力係好大，加0.75厘係好正路，問題係已經Price In咗，加0.75厘會唔會觸發股市反彈，近期淡倉係加得多咗，若加息又符合預期，短線係有機會觸發反彈，不過，如果中長線嚟講，睇返《彭博》嘅預測，加息要加到4厘，但佢認爲美國經濟係頂唔順，因為依家經濟已經放緩，甚至可能已步入衰退，過去聯儲局唔會喺經濟放緩時加息，但因為舊年「放水」太多令通脹失控，為咗修正呢個失誤，被迫喺經濟放緩下大幅加息，所以唔會係普通衰退，會係深度衰退。