【期匯決算】美匯指數步入調整期？

【Now財經台】美匯指數一度升穿上月高位，高見105.28，衝上20年高位，美匯指數2001年曾升到120水平先見頂，市場對聯儲局後日嘅加息預期不斷升溫，依家加息0.75厘幾乎已經係市場共識，甚至有分析估計，可能一口氣加息1厘，據最新利率期貨顯示，9月累計要加息2厘，呢啲預期係咪可以繼續推高美匯指數？

資深外匯分析師陳欣指，美匯指數可以企喺105，甚至以上水平，加息係非常重要嘅因素，雖然美國政府做咗好多嘢，包括釋放石油儲備等，但都冇辦法令通脹降溫，所以加息力度或要比市場預期更進取，先有機會令通脹落返少少，但另一方面又擔心會影響經濟，所以有可能最終只加0.5厘，咁就會限制咗美元嘅上升動力，又唔排除美匯指數會開始喺現水平調整。