【名家給力場】美通脹炸彈唔易拆？(上)

【Now財經台】美國總統拜登噚日指，要畀空間聯儲局主席鮑威爾，會放手畀佢及聯儲局遏通脹，之後財長耶倫又出嚟認衰，話自己錯判通脹形勢，拜登民望因為通脹飆升仲差過特朗普，到底拜登政府可唔可以拆到呢個通脹炸彈？

「股市漁夫」創辦人莊志雄指，拜登高調召見鮑威爾，但最有趣係會面後出嚟認錯係耶倫，舊年一直話通脹只係暫時性其實係聯儲局，睇返美國現任財金官員，最有公信力應該係耶倫，有可能係鋪定後路，一旦未來控制唔到通脹，就會由鮑威爾孭晒呢隻黑鑊，因為拜登話聯儲局係獨立運作，唔受華府影響。

Lewis又話，標指舊年一路破頂時，拜登民望就一路破底，依家就喺低位橫行，其實佢哋係做得好差，睇返特朗普上任時，頭400日民望係差過拜登，但過咗1年後，特朗普民望逐步攀升，但拜登就繼續跌，之前股市升拜登民望一直跌，喺通脹惡化下佢嘅民望似乎想再破底，所以佢係有好大壓力，尤其中期選舉就到，必須搞掂通脹，美股喺上個月20日後反彈，然後會出現通脹見頂嘅聲音，估聯儲局9月唔會加息0.5厘，但噚日有局方官員話未來有幾次要加息0.5厘，市場有樂觀得太早之嫌。