【名家給力場】熊市負財富效應殺傷力有幾大？(下)

【Now財經台】美國4月零售銷售有得升，帶挈美股噚晚造好，市道係咪真係咁好？而喺聯儲局不斷加息下，對樓市前景又有冇影響？此外，對Z世代嚟講，可能係第1次經歷熊市，佢哋買股票、數字資產，似乎都幾傷。

「股市漁夫」創辦人莊志雄指，零售數據升係正常，因為美國通脹高達8%以上，但未來喺量方面有機會跌，因為物價貴咗，市民就慳住用，繼而影響企業盈利。

Lewis續指，歐美樓市其實係一個泡沫，喺通脹出現長期向上趨勢下，如果過去兩三年高價追入嘅單位，一旦未來利息顯著上升，若升到5厘樓上，估計會有好多人斷供，呢啲都會對未來經濟構成好大壓力。

佢又話過去年輕人唔信股票，唔信投資，但舊年蜂擁入市，亦係輸得最慘嘅一群，因為佢哋買網紅股，亦因為冇經驗唔知泡沫係會爆破，依家嘅情況係，呢啲後生仔會輸，高追樓嘅人又將會輸，今次呢個熊市最特別嘅地方，就係連債券都跌，意味退休人士揸最重嘅資產，即債券都要跌，負財富效應係非常犀利，而且只係處於初段，仲未跌完，而對未來嘅消費影響可能好大。