【名家給力場】市場迫聯儲局放軟手腳？

【Now財經台】美國PPI高過預期，美股3大指數噚晚齊齊向下，其中道指一度急瀉逾600點，收市僅跌約百點。聯儲局主席鮑威爾重申，未來兩次會議可能各加息0.5厘，又話美國經濟強勁會承受得到，亦反映加0.75厘機會好微，但市場仍然好恐慌，會唔會影響聯儲局嘅加息部署？

冠域商業及經濟研究中心主任關焯照指，呢個係典型滯脹，因為通脹不斷升溫，央行必須加息追通脹，美國通脹高企源於供應鏈問題，加上受俄烏戰事影響，就算通脹見咗頂，回落速度都會好慢，但過度加息又會踩冧整體經濟，所以睇到美股，以至環球股市都跌得好犀利。

關博士又話，聯儲局不斷加息，資產價格就係咁跌，跌到經濟衰退就要停止加息，甚至減息，依家市場price in緊環球經濟顯著放緩，如果股市繼續跌，財富蒸發令經濟進入萎縮期，絕對唔係聯儲局樂見，所以依家市場係迫緊聯儲局放軟手腳。