【名家給力場】美股Sell in May？(上)

【Now財經台】舊年11月，「股市漁夫」創辦人莊志雄喺節目講過，當時美股已步入熊市，即使喺4月傳統股市旺季都冇乜起色，標指舊年11月至今已跌咗10%，歷史上係咪都比較差？

莊志雄指，表現係非常差，相信大家都聽過Sell in May，美股喺夏天至秋天嘅表現係比較差，因此，喺5月嘅高位就要走，等暑假後再買貨。睇返美股過去70年嘅表現，喺11月至4月平均升7%，其中55年係升，如果每年只投資6個月，就要揀11月至4月，而表現最差就係5月至10月，而傳統股災月係9月及10月，如果5月買貨，10月沽貨，平均回報只得1.5%，如果係熊市年份輸錢嘅機會係較大，Sell in May係有數據上嘅支持。

Lewis又話，即使喺11月至4月呢段季節性利好嘅情況下，標指仍要跌逾10%，同平均升7%係一個好大嘅對比，正正係呢個表現就話畀投資者知，美股正身處熊市。