【財經TOP SEARCH】股價飛唔起！國泰長遠博賣盤？

【Now財經台】截至早上11點，1小時內《彭博》用戶關注度上升最多港股，依次為國泰航空(00293)、聯想集團(00992)、福萊特玻璃(06865)、恒騰網絡(00136)、領展房產基金(00823)。

今日上榜嘅國泰、領展都係通關概念股，但表現分化，國泰偏軟，領展就靠穩，雖然市場一直憧憬年底前香港跟內地進一步恢復通關，但喺變種新冠病毒Omicron蔓延下，至今都未有確實通關日期。國泰最新喺網站公布，因撤銷機組人員豁免檢疫，未能如期運作所有已計劃航班，擬取消現時至下季部分往來香港嘅航班，甚至有報道指，香港取消內地以外航班機組人員豁免檢疫安排，通關似乎遙遙無期，相關憧憬係咪已經落空？

英皇證券銷售部副總裁林建華指，一日未落實，都可以繼續憧憬，但對國泰股價嘅憧憬就要睇遠少少，可能要睇吓國泰會唔會成為國家航空公司之一、會唔會畀人收購，多過睇公司嘅業務，因國泰本身係世界知名嘅航空公司，有品牌價值，但相信收購係長遠嘅事，短期內好難發生。