【now.com財經】上個星期五(3月22日)揀咗隻恒指熊(52361)出嚟，平均買入價為0.0535元，無Set目標價，不過就以五分鐘圖10線作為走貨量度線。
噚日隻【輪證下半Part】特登早啲出，事關都怕下半場一開市條Slow STC(14.3)抽返上去，咁就會觸發到指數出Swing Trade向上抽高。下午場返嚟開市五分鐘之後，Slow STC(14.3)兩線果然觸底抽上，連帶指數都抽高兼過10線，引起(52361)走貨訊號。
起身咪起身囉，痴線呢啲嘢唔會揸一世架嘛，更何況星期五阻住人Happy Friday！以1點10分見指數過10線走貨，如常用10分鐘作為沽貨時間的話，(52361)期內高低位做過0.067元/0.061元，平均走貨價為0.064元。呢一趟平均執11格或20.75%，哈哈，不如直接復活節算啦！
話咁快又嚟到3月最後一個星期，今個星期五(3月29日)因為係復活節假期，紅日嚟嘅，所以變相今個星期只係得四個工作天:)；而星期三(27日)就係期結日，同時亦都係今年度首個季結日期，恒指借唔借呢個機會做返好少少？難講，因為從來都無人講過期結/季結就一定會做返好，只係大多數情況都會係咁啫。又啱呀，呢個世界都真係無嘢係絕對。
望埋今日牛熊街貨，熊證雖然有兩層新增街貨層，不過以近證計，近牛嘅街貨仍然比近熊嘅多，重點係上個星期其實牛證keep住級有一層過千張期指街貨層，今日仲要儲到上兩層添；而熊證仲未見儲到咁多。咪住先，淡友們，係咪連你哋都無信心再淡落去先？
今朝早恒指開市都係郁咗30零點，到依家9點41分，指數一度升幅擴大至過百點嘅，但喺五分鐘圖上已經見到今日開市首兩粒燭留底長長上影線；而喺小時圖上見喺10/150線前指數出上影線，如果依家呢個位已經係高位的話，咁以呢個形態出現就會變成「射擊之星」啦。
終於等到10點，見小時圖上指數目前燭身仍然處於頂線樓上，不過同步10線向下落緊去頂住指數。但比較麻煩嘅係其實開咗市半個鐘，五分鐘圖上見保鳥歷加通道頂至底高度只有62點，唔通今朝指數想我哋做咗嘢先？下半場先至返嚟開工？
作者阿珊，以技術分析專心玩輪證，唔貪心，努力賺取我家肥貓罐罐。
Patreon新增內容【開市前速報】，七日免費試用：https://www.patreon.com/join/cbbcwar
