【now.com財經】噚日揀咗隻恒指牛(52894)出嚟，平均買入價為0.0465元，計劃只係借一借五分鐘圖Slow STC(14.3)兩線向上去返超買位就收工走人。
喺噚日出【輪證下半Part】嘅時侯，就剛好見到Slow STC(14.3)兩線上到去超買位，同時指數亦靠近返之前諗住踩得到嘅小時圖量度線位16,915點嘅位置，拿拿聲喺篇文裡面大叫散貨先，條數慢慢先計。
以噚日下半場五分鐘圖上見Slow STC(14.3)上返去超買位嘅時間係1點半至2點5分，呢段時間就正正係(52894)可以出貨嘅時間，期內按(52894)高低位做過0.057元/0.049元計，平均走貨價為0.053元。呢一Round大約用咗兩個鐘鬆啲(包埋食飯時間)平均執6.5格或13.98%。基本上又可以直接熄mon或者做其他嘢。
噚日美股同日股都先後創出歷史新高，到於港股...都真係唔好提，佢肯郁已經感恩啦。
今朝起身見美國再升多幾百點，向住40,000點出發，至於恒指就反高潮向下跌117點開市，到依家9點42分，指數跌幅已經擴大至跌246點，報16,616點，第一層牛證16,700至16,799點都已經全數收回，呢層有相當於642張期指，為最多新增街貨嘅街貨層，向下數落去16,600至16,699點同16,500至16,599點分別都只係有125同148張期指街貨，數到16,400至16,499點就精彩啦，呢度有相當於1,125張期指街貨層，重貨區嚟架；不過今日指數係咪咁痴線要向下落到去呢個位，搜術上就未必啦，事關如果指數落到呢個位嘅話，就即係失守日線圖嘅「上升通道」，呢條「上升通道」千祈、千祈唔好確認失守，如果唔係港股又唔知會迷失幾耐。
講就係咁講啫，失唔失唔係你話架嘛，依家9點53分，恒指向下再落暫見低位16,580點，作戰室第一注淡倉出動後到依家都準備收割，皆因五分鐘圖上見保歷加通道有開始整條向下運行嘅走勢。又咁講指數落到呢個位再追淡難度係增加咗嘅，反過來係等佢鬆一鬆之後先至再追會比較好。
如常，睇呢篇文嘅你，我哋用返個小時圖去Trade。仲有4分鐘先至10點，指數喺小時圖上已經裂口低開兼生出「大陰燭」出嚟，一棍向下叉到落到150線位置，呢條線就係早幾日踩得好硬嗰條150線，但對比埋Slow STC(14.3)的話，今日見Slow STC(14.3)剛剛出觸頂向下樣，換個保歷加通道出嚟見橫行，咁即係小時圖係有條件出Swing Trade啦？
10點過後見指數於小時圖上確認失守150線，不過都拉定條底線出嚟線。恒指熊(52361)，收回價17,000點，同現價有約370點距離，槓桿約37.79倍，為同一收回價中槓桿最高，
話就話佢失咗小時圖條150線，但都借一借早幾日低位喺小時圖上拉條底線，如果連條底線都無埋嘅話，嘿，你諗你。
作者阿珊，以技術分析專心玩輪證，唔貪心，努力賺取我家肥貓罐罐。
Patreon新增內容【開市前速報】，七日免費試用：https://www.patreon.com/join/cbbcwar
