【now.com財經】今日為年三十，先祝各位讀者新年進步！萬事如意！龍股翻騰！最後都係好老土但都係要重要嘅身體健康！事關呢個新年似乎都要同寒冷天氣警告一齊過，大家出外拜年都要著多件衫。
港股今日繼續吹寒風，開市跌168點，報15,709點；計過度過喺作戰室先開第一注淡倉，事關指數呢下開市擺位已經同牛證第一層街貨甚近，而呢一層街貨亦都係重貨區，有成過千張期指街貨喺度，而作戰室嘅第一注淡倉，有可能係今日唯一一注，甚至係癸卯年最後一注倉，因為今日係只有半日市，不過大家都望住呢層肥牛，睇下團年飯加到啲咩餸啦！
依家9點49分，喺呢度如常用返小時圖睇市，開市到依家見「大陰燭」向已經落到去保歷加通道底線，暫時見保歷加通道口就未見拓闊嘅，SLow STC(14.3)兩線都落到超賣至嚴重超賣範圍，或者都係等睇10點打後小時圖嘅保歷加通道口拓唔拓闊先至決定淡倉仲有得再出/再Hold喺手。
同戰友吹緊水嗰時，10點未到恒指已經落到15,540點，見今日暫時低位，而作戰室嘅淡倉目標亦已經完成，就係將第一層肥牛全吞囉，先唔理今日餘下嗰兩個鐘嘅交易時間個市發生咩事，好頭好尾今日正數收爐先攞個意頭。
另外，噚日都收到幾位讀者 inbox 提我今日揀定隻牛證比佢哋過新年。嗱！呢個玩法同技術係完全無關係，基本上純運氣多於一切。
話晒都要過四日夜，所以新年牛都要揀返遠少少，恒指牛(67879)，收回價14,988點，同現價有近600點距離，有約23.97倍槓桿，呢一注過夜博開紅盤注嘅玩法只係等下個星期三(2月14日)開市返嚟，完U之後見開市係升(即係開紅盤)之後，到正式9點半開市就掉走佢先，先為自己取得甲庚年第一注正數嘛，其實同啲風水佬話初幾開工大吉，唔做嘢都開一開部電腦先嘅道理一樣，只係紅盤先走好倉呢件事睇上去比開一開電腦嚟得更「實際」。
少少可以借一借技術分析嘅係，臨完場能可能5分鐘或者10分鐘，睇下五分鐘圖Slow STC(14.3)有無出觸底機會，有嘅話，咁呢一注ON TOP 有少少技術成份，希望增加勝算。
再三提醒，呢一注一放要放四日，亦都只係純運氣，所以注碼上一定要比一注係一旦全輸都唔會肉赤，真係當買張新春金多寶咁上下架咋！
再祝各位讀者來年事事順景！一帆風順！
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室免費試用：https://www.patreon.com/join/cbbcwar
