【now.com財經】今朝揀咗恒指牛(67421)同恒指熊(67548)，事關當時喺五分鐘圖上見Slow STC(14,3)處於中軸水平，同時指數又企喺中軸前，喺未知佢要上破定係受阻之前，最安全嘅做法更係等佢有方向先至出決定，所以牛熊各兩手準備。
以今朝Patreon出文時間10點36分計，On top比多10分鐘作為睇文時間，即10點46分(方便計數用10點45分)，見到仍然受制於50分鐘線(五分鐘圖10線)同100分鐘線(五分鐘圖20線)，喺呢個時侯可以選擇出(67548)，以10點45分至10點55分作為出貨時間計，期內(67548)高低位做過0.052元/0.049元，平均買入價為0.0505元。
踏正11點，即係落場後嘅五分鐘，指數忽然向上抽高上行，仲反方向上破埋50分鐘線同100分鐘線，不過，同一時間保歷加通道口未見有拓闊走勢，喺平衡線內嘅保歷加通道，仍有一線生機博指數上到頂線之後會出Swing Trade向下回落，咁隻(67548)都尚算可以守下。
捱半個鐘，指數下次失守50分鐘線同100分鐘線，之前諗住嘅平衡線下保歷加通道出Swing Trade落返底線有希望，去到臨完上半場前15分鐘，唔知邊度嚟隻神來之手，將阿市向下推落懸崖邊，五分鐘圖上見一支「大陰燭」出現，將指數推返落跌逾300點，創上半場低位，(67548)亦守得雲開，喺上半場完場前五分鐘，Slow STC(14,3)兩線落到超賣水平，但%K線已經高走%D線，即係出現咗觸底嘅走勢，喺完全未搵到有消息推出個市之前，(67548)高低位見過0.063元/0.059元，平均買為0.061元，點計都無啦啦有10格落場，梗係食咗先講。
午後開市見指數有再向下鋤多一下，依家1點6分，指數暫時低見19,602點，即係爭2點指數就正式進入牛證第一層街貨19,500至19,599點。承如今朝所指，喺日線圖上見嘅走勢係偏向淡，再加埋依家指數無厘頭又走返近牛證街貨層的話，唔難估計聽日返嚟會見到牛證會儲得多今日更多街貨，更吸引阿市向下殺牛，問題永遠只係在於邊一個位切入出淡倉係相對理想。
依家1點12分，五分鐘圖上見Slow STC(14,3)兩線已經行緊超賣再超賣 ，50分鐘線向下落緊差唔多至指數位，保歷加通道口仍然拓闊中，隨時50分鐘線成為指數阻力都唔出奇，Slow STC(14,3)要Keep住行超賣再超賣的話，條件係保歷加通道口要保持拓闊，集齊呢三個花印再出淡倉啦。(67458)收回價同現價有逾570點距離，所以依家睇槓桿得返約25.99倍，做DT都可以嘅，唔覺意過埋夜嘅話都安全嘅。貼價返少少嘅可以考慮(67879)，收回20,100點，同現價有近450點差距，槓桿上返約31.69倍，失心瘋落都怕佢失心瘋飆架。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
