【now.com財經】噚日揀咗隻恒指牛(68897)出嚟，喺上半場10點30分至10點40分買入，平均買入價為0.058元；喺下晝Set好以五分鐘圖嘅10線作為量度線。
相信見到恒指上返16000點樓上時，大家都會覺得有啲高處不勝寒，我都係一樣，所以唯有好好地Lock實量度線。持貨至大約噚日下午2點35分左右，見指數喺五分鐘圖上失守10線，嚴字策略之下(68897)準備起身離坐。如常的內10分鐘作為走貨時間的話，即按2點35分至2點45分收割隻(68897)，以期內高低位做過0.089元/0.083元計，平均收割價為0.086元，呢一趟平均勁賺為28格或48.28%。收得爐啦，係咪呀？
今朝起身出面又嚟大霧仙境，氣溫都開始下降返；不過恒指似乎仲未降溫，今朝開市再升146點，報16282點，直接將第一層熊證街貨16100至16199點全數收回先，嗰度唔多，得相當於37張期指，好明顯係唔夠飽，所以指數喺開市後先保持處於高位抖順條氣，再向上高衝多100點，依家9點59分，恒指第二次上到去16400點樓上，16200至16299點，以及16300至16399點呢兩層熊收晒，呢兩層分別有相當於777張同472期指，加埋上去即指數已經將1286張期指街貨全數收回。至於作戰室今日繼續好倉迎戰，亦見有戰友將好倉率先收割，繼續過肥年。
再去到10點，小時圖行出粒新嘅燭，高位見16408點，同開市首半個鐘出嚟個粒燭嘅高位16406點爭兩點，係呀，爭兩點平頂出現，不過暫時見指數都未係好肯向下，未知係咪高位抖抖先呢？係嘅，向上望住16500至16599點嗰堆肥熊...攰都抖一抖先啦。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室免費試用：https://www.patreon.com/join/cbbcwar
