【now.com財經】老老實實，噚日喺作戰室都真係玩得唔好，先係手執好倉但捱唔過11點前指數一度失守小時圖借位拉線嘅15412點，繼而兩次「大陽燭」抽高爆上都差啲迫死淡倉，可能造淡造得耐，唔係好信港股會升，更加唔信東升西降，所以就GG咗一日；Anyway，重整心態後，希望今日可以重新捉得返指數條路。
今朝指數開市升31點，報15541點，呢口開市價唔係話變化好多，亦都見企住喺牛熊證街貨圖嘅中間位，以今日嘅牛熊街貨分布，目測仍見牛證方比熊證方多街貨，不過，噚日指數都已經係咁擺，但偏偏反地心吸力上行；同時喺作戰室同戰友率先睇五分鐘、小時圖至日線圖，Slow STC(14.3)擺位都處於中軸水平兼未見勢頭，咁樣中間位真係開邊一邊都可以。
終於等到正式開市，依家9點41分，恒指選擇向上行，暫時高位見過15700點，作戰室今日第一注都以好倉應市，無他嘅，都只係做一啲順勢而行嘅動作啫。
10點未到指數爆升200點有多，依家9點53分，最高暫時見15738點，噚日作戰室玩得唔好，就當自己太耐無出好倉，要啲時間比自己轉一轉個諗法，還好今日轉得切，作戰室裡面戰友再報喜；真係唔會日日都贏，我都係，只係都係嗰句：如果你一日贏一格，一個月20個交易日你已經有20格落袋啦！
再睇小時圖，今朝指數一下子高衝之後，喺小時圖上見指數上破咗10/20/50線，嚟到10點2分見指數完完全全企高於100線之上，蓋目前Slow STC(14.3)兩線向上，頭頂條50線當住可以再去嘅下一站先，不過指數搶足半個鐘之後，喺五分鐘圖上Slow STC(14.3)兩線上到超買，指數亦似有少少需要向下回一回，借一借17500點位置作下方量度線，除咗係齊點之外，喺五分鐘圖上呢個位亦都係今朝開市後10分鐘嘅爭三點「平頂」位嚟嘅，咁阻力破到就變支持架啦，係咪？
恒指牛(68897)，收回價15288點，同現價有約355點，槓桿有約34.76倍，都夠做Day Trade，先留意指數回落15700點有無支持，見支持出好倉可以，否則如常用返五分鐘嘅Slow STC(14.3)做Swing Trade，即係等回到落超賣位先至出手。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室免費試用：https://www.patreon.com/join/cbbcwar
