【now.com財經】噚日揀咗隻恒指熊(60418)出嚟，喺上半場吼指數10點15分時過唔到五分鐘圖10線而出場，如常的用10分鐘作為買入時間的話，平均買入價為0.0535元。同時亦預設用返10線作為量度線，只係去到下半場時見五分鐘圖上10線同20線愈來愈近，博雙線阻力出現+保歷加通道口重新拓闊之下，無Set目標價，鍾意數夠數就走，唔鍾意嘅就等線位；想過夜嘅睇住注碼，唔過嘅臨完場前收隊走人。
去到下半場2點40分，見指數確認企返10線以上水平，亦都觸發咗(60418)離場訊號，都夠皮啦，當時指數連17,000點都無埋，低位仲見過16,881點，即首五層牛證街貨全數被收回，呢度夾埋都已經4,371張期指。
以2點40分起計如常用10分鐘作為走貨時間，期內(60418)高低位做過0.074元/0.072元，平均走貨價為0.073元，呢一趟由朝揸到午，平均執到19.5格或36.45%，全月賺幅最勁嘅一注。
噚日恒指微升4點，今日恒指微跌8點，咁細嘅開市點數喺開市前真係好難Set定作戰策略，唯一可以借得到嘅係個牛熊證街貨圖。今日返嚟見首四層牛證街貨層層都過千張期指，重貨區向下移到16,500至16,599點，呢層亦都係最多新增街貨層，有相當於1,778張期指街貨。至於熊證方面，第一層落到去17,500至17,599點，呢層有相當於459張期指街貨，已經係重貨區啦，所以即使見到五分鐘圖同小時圖都有似觸底回升嘅跡象，但大家都係偏向出淡倉。
仲有兩分鐘就到10點，恒指一度跌逾120點，低見16,863點，呢口價已經低過10月24日低位16,879點，換言之指數已經再創年內新低，同步作戰室亦有戰友已經完成淡倉之後，見到創年內新低兼出「平底」亦火速反手好倉都食埋，動作快過我打稿。
「真係就咁樣放過下面四層重牛？」咁又未必，坐監都要放下風啦，小時圖見指數其實呢兩日咬住16,900點呢個位都咬得幾緊，的確指數嘅支持位由此前大家預嘅17,000點攻防戰稍為向下移咗100點，比較在意係小時圖上面10線緩緩向下中，好想知倒底過定唔過。
嚟到依家10點22分，作戰室都只係用緊133點高度嘅保歷加+Slow STC(14.3)做Swing來回跑，如噚日一樣稿未打完佢哋已經走咗幾轉；睇文的都係等返個小時圖啦。
作者阿珊，以技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
