【now.com財經】噚日全天候暫停工作，因為湊大我嘅婆婆走了，嚟得有啲突然，縱然萬般不捨，但人總會行到呢一步，兒時回憶全數湧現；可幸嘅係經歷過七年前公公嘅離開，當頭棒喝的後悔無同公公爭取更多相處時間，所以呢七年來盡力抽時間陪婆婆，所有關於佢嘅嘢我都一一儲底，就連一個留言信箱嘅message我都儲起...最後發現原來點儲都係唔夠。
感謝作戰室戰友、讀者們及Big Boss嘅體諒及關心，今日如常工作係可以嘅，有啲嘢做吓希望可以分散啲注意力(但求唔好忽然跳掣)。
一日無睇市發現其實都無乜大變化，日線圖上見指數早排一度上破年初至今大型「下降通道」兼築起「上升通道」時，再來18,000點攻防戰，可惜最後都係無功而回，指數重新回落返去大型「下降通道」裡面嘅同時，噚日似乎連「上升通道」都無埋，估計應該唔少人會再睇返17,000點呢個位。
再睇埋牛熊證街貨圖。今日見有一層新熊上市，最貼落到去17,600至17,699點，而指數向下落迫到牛證退到第一層見17,300至17,399點。目測見牛證街貨量雖然比噚日有減少到，但總體上仍然比熊證嘅多，而以噚日恒指收市價計，指數本身已企於牛證第一層，恐怕又係街貨贏。
完U後見恒指開出嚟升4點，有少少意外，事關隔晚ADR都見恒指有65點跌幅。不過阿市從來都唔會令你失望，開市後指數即向下落見紅，依家9點37分，指數跌75點，報17,279點，第一層牛證街貨全數被收回，明明今日期結日，指數都仲係見紅，似乎都係見咁近牛證街貨，唔食確實有啲嘥。
恒指熊(60418)，收回價17,721，同現價距離一拉拉開到有491點，五分鐘圖上見依家保歷加通道口拓闊緊，作戰室戰友快到已經完成第一注淡倉啦(依家只係9點45分咋)，進取嘅即出唔阻你，我哋都係借緊小時圖條保歷加底線做目標啫，爬格仔快閃黨自己數啦，安全嘅可以等等五分鐘圖10線落到嚟時有無阻力，再唔係用返Slow STC(14,3)上返超買都得，但有可能要等到下半場先見到囉。
作者阿珊，以技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
