【Now財經台】中央突然公布年內增發1萬億人仔國債，以支持災後重建嘅基建開支，刺激基建相關股今日造好，其中，濰柴動力(02338)表現一技獨秀，A股更一度漲停，H股早段一度高見12.04元，飆升14%，收市仍升9%，報11.5元。
濰柴兩星期前發過盈喜，預告首3季多賺80%至1倍，集團下周一(30日)就會出第3季業績，現價係咪啱做業績前部署？
博威環球證券金融首席分析師聶振邦認為，市場過分睇淡濰柴業績，其實公司上半年業績唔差，首季收入按年增長18%，中期更增長22%，反映第2季收入增速加快。此外，濰柴嘅業務較其他重型機械股多元化，中期有近40%收入來自智能物流業務，加上發展前景樂觀，相信市場對公司基本面有信心。
不過，聶Sir指，今日可能有唔少投資者趁政策消息出貨，股份隱現沽壓，但相信股價喺11元水平有支持，有望進一步挑戰5月時13.5至14元水平。
