【Now財經台】生產紙巾及個人護理用品嘅維達國際(03331)，今朝開市前出咗業績，雖然上半年毛利率跌至25.1%，但相比首季嘅25.2%，似乎已經穩定下來，公司指，雖然木漿價格下跌，但因為之前買入嘅庫存價格高，導致拖累毛利率，不過，隨著庫存逐步消耗，木漿價格導致毛利受壓嘅情況，下半年係咪有所紓緩？
艾德金融聯席董事陳政深指，毛利受壓情況係有機會紓緩，但木漿價格始終轉嫁唔到畀客戶，另一方面，內地面對通縮問題，外圍就繼續通脹高企，呢個情況會繼續困擾企業，除影響毛利率，盈利及會計報表亦會受影響，其中，推廣開支會顯著增加，反映內地競爭激烈，令公司雪上加霜。
Ryan又指，維達負債情況亦要關注，因為集團負債比率上升，喺整體融資環境日趨嚴峻下，負債上升會增加財務開支，呢方面要更加小心。
