【Now財經台】嗶哩嗶哩(B站)(09626) 推出自家製作動畫，由內地長篇科幻小說改篇而成嘅科幻動畫《三體》，上周六正式獨家登陸B站平台，目前播放量已突破1億次，一時間成為內地網媒熱話，《三體》效應會唔會持續發酵？點睇對B站短期及長期嘅影響？
元宇證券投資總監林嘉麒指，短期係有炒作空間，《三體》係好出名嘅小說，有一定票房保證，但都要睇B站實際上有幾多落袋，因為喺內地做電影投資有好多開支，票房又要分一大截比戲院，做製作唔會大賺，暫時只會有短線炒作，唔好期望對B站盈利有好大貢獻。
KK又話，《三體》版權係屬於另一名投資者，所以知識產權(IP)衍生嘅價值、周邊產品，唔會好似閱文集團(00772)咁，因為佢哋投資咗IP慢慢發展，如果《三體》大賣，計埋分紅及比版權稅後，未必帶挈B站賺好多。
