【Now財經台】截至早上11時止，1小時內《彭博》用戶關注度上升最多嘅港股，依次為閱文集團(00772)、李寧(02331)、中國信達(01359)、世茂集團(00813)及海吉亞醫療(06078)。
閱文斥資6億人仔收購騰訊控股(00700)動漫平台，並斥資10億人仔喺未來1年回購股份，收購資產包括APP平台資產、動畫項目、影視項目及從事動漫創作嘅米橙子90%股權，相關資產舊年都蝕緊錢，但唔算蝕得多，點解騰訊要賣？
富途證券高級策略師譚智樂表示，其實閱文本身嘅發展方向都好依賴同IP品牌合作，市場都會睇蝕錢情況嚴唔嚴重，會唔會導致成間公司嘅現金流轉差，對比閱文市值300幾億，今次嘅收購規模唔算大，用6億做收購唔會對公司現金流有好大影響。
至於閱文股價今日抽升逾10%，Arnold認為，主要係回購效應。
