【now.com財經】上半場市恒指走勢都有少少無稜無可，時升時跌，不過五分鐘圖上見指數於初段後守穩保歷加上升通道，同時又見保歷加通道口有拓闊情況，於是都喺作戰室出好倉，以五分鐘圖上見指數仍處於保歷加上升通道為持貨理由，一失中軸，又係咁先啦，下次再玩啦！
喺作戰室裡面，並唔係大家想像中只講大市走勢，個股表現；亦都唔會戰友同戰友之間溝通清零。我都經常認為一個隨時可以爆笑、無壓力、氣氛輕鬆嘅地方，做事先至會事半功倍，所以作戰室裡面，市旺大市一齊嗌升，市靜大家閒話家常，今日仲意外地知道有位戰友同我係同屋苑嘅街坊，真係意外收獲。
跟得呢個專欄耐嘅讀者，都應該記得我個股方面真係神經刀，唔知點解最叻都只能做到五五波，無指數相對咁「得心應手」，所以隻領展(00823)確係伏咗，指數升啲防守嘢果然唔掂，好彩Set好咗以小時圖失20小時線(小時圖20線)為走貨位，喺今朝大約10點45分左右，就已經見到股價失咗呢個水平，(23660)立斬，以10點45分起計10分鐘作為斬貨時間，其內(23660)高低位做過0.049元/0.048元，平均走貨價為0.0485元，呢一趟平均輸13.39%。(我唔係嗰啲輸打贏要嘅唔計數嘅)
今日Lunch Time約咗兩位Big Man食Lunch，席間都有間中望下個市，見到指數午後升幅愈升愈有，依家2點17分，地鐵上睇市見升愈200點，五分鐘圖見保歷加通道中軸都未有失過，喺作戰室由點幾到依家，先後三次叫咗「好倉繼續」，相信作戰室裡面嘅戰友一係率先收割，可能要出去見客或者開會，一係繼續到依家，再博指數繼續向上殺熊。
望多眼隻領展，五分鐘圖出大V反彈，唉，算啦，或者佢係適合長揸多於短炒。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
想入作戰室？Click呢度就得：https://www.patreon.com/cbbcwar
