【輪證贏家】無腦熊算啦
【ETF及債券】 2024/04/17 10:33
【now.com財經】噚日對恒指無乜興趣，反而叮上咗隻SPDR金ETF(02840)，見佢同指數噚日都向下回落去，諗住比多少少時間同耐性，睇佢日線會唔會向下回返落去10線，比個靚少少嘅位嚟入隻S金Call(24063)。
貨都揀定埋都見到誠意十足，誰不知噚晚鮑老爺放鷹，暗示將利率維持於高水平之下，拮中咗金價嘅穴道，紐約6月期金收報每盎期2,407.8美元；依家距離恒指完U仲有五分鐘，隻S金單位價格亦已見綠燈。完U後S金開報1733元，升1.17%；至於恒指則跌23點，報16225點。
喺作戰室如常的由五分鐘至日線圖咁去睇晒所有圖同拉定量度線。蓋小時圖噚日最後留低「十字胎」+Slow STC(14.3)觸底，日線圖向下退一步都仲有「長方形」底線接住；只不過目前指數擺位又踩住牛證街貨。知道向來街貨 VS 投術分析都係前者勝嘅，但兩個唔同時軸嘅圖都有見觸底樣，倒想開個好倉試一試佢。
及至開市後，指數即見低開高走，依家開咗市10分鐘，高位見過16,316點，不過16,300點似乎暫時都未有力守得到。喺16,250至16,300點呢個50點區間吽咗半個鐘之後，指數終於向往街貨方向打落去，16,200點已經喺10點初段時間失守，16,100至1,699點呢層有相當於995張期指街貨，咁嘅樣都係無腦恒指熊(55213)，收回價16,722點，同現價有約417點距離，已經係市場上最貼價嘅熊證，槓桿約30.77倍拉到盡之中，成交活躍，睇下今日16,100點守唔守得到。
作者阿珊，以技術分析專心玩輪證，唔貪心，努力賺取我家肥貓罐罐。
Patreon新增內容《開市前速報》，七日免費試用：https://www.patreon.com/join/cbbcwar
想睇更多財經消息
